【唱片碟評】對 Eason 的 “準備中" 有一些說話……!

八月 29, 2015

想過好耐究竟出唔出呢個 POST, 因為今次小瑟唔係想話 Eason 隻碟點好點好, 只係上次在【Devialet Phantom 魅影魔球喇叭】活動上, 我地試左好多不同的歌曲, 有外國好多流行歌手的作品, 就連梁醒波波叔既審死官我地都播埋, 但就係播 Eason 呢隻 “準備中" 的 “無條件" 時, 雖然短短四分鐘既歌, 但大家就好似過左好耐咁, 其唱片出來之效果, 另小瑟突然想起一D野想同大家分享的!!

eason_cd_18

其實依家香港唱片業, 已經差唔多去到出一隻, 蝕一隻既地步, 但唱片公司又係靠咩為生呢?? 呢個我諗小瑟唔講大家都知道, 唔知又係咪因為咁, 所以依家好多POP星既唱片都真係出得求求其其, 但依家仲可以出到大碟既歌手真係唔多, 而Eason 依家貴為香港唯一一個天皇級既歌手, 出一隻碟基本上都真係可以話係代表我地香港唱片既一個指標, 點解唔可以將D聲調校好少少先推出市場呢?

聽流行曲又唔係聽莫札特?

雖然可能好多人都會話 : “流行曲姐, 又唔係聽莫札特, 洗咩咁好聲呀???", 雖然我有時都會認同呢個講法, 唔係下下都要用 " 發燒碟 " 既定義去講好聲定唔好聲既, 不過轉過角度睇, 以買家既角度出發, 付出左金錢, 除左買歌手團隊創作之外, 其實隻碟出來效果, 高中低音清楚自然係基本需要, 其實早在小瑟細細個買錄音帶, 買LP, 買CD的年代, 好多流行曲歌手的唱片到依家都仲可以囉來作試音之用就可見一班, 好似以前羅文的唱片, 小瑟細細個行音響店時, 其黑膠唱片出來效果音場之廣闊, 羅文人聲之雄渾有勁, 其樂器清晰定位如數家珍一樣, 令成首歌出來除左旋律好聽之餘, 整首歌一路聽一路有樂在其中之感覺架.

如果覺得羅記太遠了, 點可以同依家比呀??? 好, 再近D, 哥哥張國榮, 1989年作品《側面》內, “暴風一族" 一曲到依家都仲係好多Hi-Fi發燒友會囉來作試器材之用, 其錄音水準之高, 音效動態範圍之闊, 開頭INTRO音樂既震撼足以令一眾發燒友暗暗為自己 “香港出品" 呢四個字感到光榮.

最後一個不得不提的就係張學友, 當年由歐丁玉監制的 “真情流露" , 又係到依家大家都仲係會囉隻碟來收聽, 試音之用, 當然仲有小瑟至愛 Beyond, 佢地當年去日本都有一定原因係覺得果邊錄音質素強勁, 而最尾 家驅 出既 “樂與怒" 大碟到依家聽返都仲係享受音樂不二之選……..!

香港可以要求唱片質素的人已經唔多了.

小瑟講咁多其他人既唱片做咩呢??? 雖然小瑟都知依家做音樂, 串流已經佔收入既好大部份, 但去到 Eason 呢個地位, 係咪可以考慮一下做一隻世界級水平制作既唱片出來比全球欣賞佢既樂迷呢?? 雖然 Eason 可能會認為佢既歌不肖做什麼Hi-Fi靚聲唱片, 所以唔需要太注重呢方面既野, 而小瑟亦唔係話想 Eason 出什麼 Hi-Fi 靚聲碟, 之不過, 仲有能力可以要求唱片質素的歌手已經唔多, 真係好希望小瑟近年喜愛的 Eason 可以出返D可以一聽再聽, 值得讓我靜下來細心欣賞, 仲要係可以不時都拿出來回味再回味的唱片呢.

聽 “準備中" 的一些感覺

以下係小瑟聽完呢隻"準備中"之後的一點小聽感, 雖然小瑟唔係什麼Hi-Fi發燒友, 家中或出街的器材亦唔係什麼過百萬的靚機, 不過聽歌既野, 主要係聽感覺, 但如果連小瑟D唔入流的器材都聽成咁樣既感覺, 都真係希望依家貴為樂壇一哥的 Eason 有機會可以留意一下, 小瑟聽流行曲唔係要靚聲, 只係唔想咩動態都冇, 音樂平鋪直敘地以沉悶的效果來演繹出歌者的作品……….

聽無條件時, Eason把聲好似縮左入去咁,唔好講音場,成個音像平淡到不得了,最直接的講法係, 電結他唔似電結他,樂器中的音色唔知點解好似比人做過手脚,壓縮到變左聲咁, 係咪要就320K的串流播放定係電台播放, 所以需要將音效壓縮呢??

eason_cd_19

eason_cd_20

分享文章網址: https://goo.gl/FUYUfm